ہارسنگھار

ہارسنگھار
اب ہم آپ کو چند اہم گھریلو ٹوٹکے اور کھانے پینے کے معمولات بتاتے ہیں جو حسن و صحت کے حوالے سے صدیوں سے مستعمل ہیں اور آپ کے لیے بھی انتہائی کارآمد ثابت ہو سکتے ہیں۔
نہار منہ پانی پیجیے:
اپنی رنگت نکھارنے کے لیے صبح نہار منہ دو تین گلاس پانی پینا اپنا معمول بنالیجیے۔ شروع میں ایک آدھ گلاس پیجیے۔ آہستہ آہستہ آپ کی عادت بن جائے گی۔ اس سے قبض نہیں ہوگی، خون پتلا اور صاف ہوگا۔ دوران خون ٹھیک رہے گا، آنکھوں کی چمک بڑھے گی۔ چہرے کی تازگی اور دلکشی میں اضافہ ہوگا۔
صبح کی سیر:
صبح کی سیر کی اہمیت سے آپ یقیناً آگاہ ہوں گی۔ اگر ممکن ہو تو صبح کی سیر ضرور کریں۔ کھلی اور صاف ہوا میں لمبے لمبے سانس لیں۔ ہلکی پھلکی ورزش کریں۔ چہل قدمی کی اہمیت سے بھی انکار نہیں کیا جا سکتا۔
آنکھوں کے گرد سیاہ حلقوں کا خاتمہ:
رات کو پانچ عدد بادام کی گریاں پانی میں بھگودیں۔ صبح چھلکا اتار کر نہار منہ ایک ایک بادام چبا کر اس طرح کھائی کہ لعاب دہن (تھوک) کے ساتھ مل جائے۔ اس کے بعد ایک کپ دودھ بالائی اتار کر پی لیں۔ رنگ نکھرے گی اور آنکھوں کے گرد سیاہ حلقے بھی آہستہ آہستہ دور نہ سہی لیکن کافی حد تک کم ضرور ہوجائیں گے۔
دوپہر کا کھانا:
دس بجے ایک سیب کھائیں یا موسم کے اعتبار سے تازہ پھلوں کا ایک گلاس جوس پیجیے۔ دوپہر کے کھانے میں ایک چپاتی اور حسب پسند سالن کے ساتھ، ایک کھیرا، ایک ٹماٹر اور تھوڑی سی بند گوبھی کی سلاد کھائیں۔ اگر آپ شام کو چائے پینا چاہیں تو اس کے ساتھ دو عدد بسٹک کھائیں۔
رات کا کھانا:
ساڑھے آٹھ یا نو بجے رات کا کھانا کھالیں لیکن پیٹ بھر کر نہیں بلکہ تھوڑی سی بھوک رکھ کر کھائیں اور سونے
سے پہلے ایک کپ دودھ (بالائی اتار کر) پی لیں اور کسی اچھی سی کتاب کا مطالعہ ضرور کریں۔

یہ تو متوازن غذا اور صحت مند سرگرمیوں کی باتیں تھیں۔ اب ہم آپ کو چند ایسے ٹوٹکے بتاتے ہیں
جو آپ کی رنگت نکھارنے اور آپ کو جاذب نظر بنانے میں اپنی مثال آپ ہیں۔

٭ بیسن لے کر رکھ لیں۔ صبح سویرے کچے دودھ کی آدھی پیالی میں بیسن یا ابٹن ڈال کر گاڑھا پیسٹ بنالیں اور چہرے پر لیپ کریں۔ دو منٹ کے بعد انگلیوں کی پوروں سے نیچے سے اوپر کی جانب آہستہ آہستہ ملیں۔ ابٹن نیچے گرتا جائے، یہاں تک کہ چہرہ صاف ہوجائے۔ اب چہرے کو ٹھنڈے پانی سے دھولیں۔ آنکھوں میں ٹھنڈے پانی کے چھینٹے ماریں پھر کسی صاف ستھرے تولیے یا ٹشو پیپر سے چہرہ صاف کرلیں۔ دودھ کی خوشبو دور کرنے کے لیے ٹالکم پائوڈر ہتھیلیوں پر مل کر چہرے کو ہاتھوں سے آہستہ آہستہ تھپتھپائیں۔ چہرے
کی جلد نرم بلکہ مخملیں سفید ہو جائے گی۔

٭ بعض خواتین یا نوجوان لڑکیوں کے چہرے پر چھائیاں سی پڑ جاتی ہیں۔ جگر کی گرمی بھی اس کا باعث ہو سکتی ہے۔ جگر کی گرمی دور کرنے کے لیے دس گیارہ دانے عناب لے لیں اور رات کو کسی مٹی کے پیالے میں بھگو دیں۔ صبح نہار منہ ان دانوں کو مسل کر موٹی ململ کے کپڑے سے چھان کر شکر ملا کر پی لیں۔ اکیس بائیس دنوں بعد نتائج سامنے آنے شروع ہو جائیں گے۔ اس کے ساتھ ساتھ زیادہ چکنائی اور گرم تاثیر کی چیزوں بالخصوص گڑ، تیل، بینگن، مسور کی دال وغیرہ سے گریز کریں۔

٭ آدھے لیموں کا رس، ہلدی آدھا چائے کا چمچ، بیسن دو کھانے کے چمچ ملا کر پیسٹ بنالیں اور اس کا ماسک چہرے پر لگائیں۔ چھائیاں کافی حد تک ختم ہو جائیں گی۔

٭ سفید تل لیجیے اور بھینس کے دودھ میں ڈال کر پیس لیں اور رات سوتے وقت چہرے پر ملیں۔ صبح اٹھ کر کسی اچھے صابن سے منہ دھولیں۔ چھائیاں دور ہو جائیں گی اور چہرہ کھل جائے گا۔ دن میں بھی چہرے کی صفائی کا خاص خیال رکھیں۔ روزانہ 3 بار کسی اچھے صابن سے منہ دھوئیں۔

٭ بادام تھوڑے پانی میں بھگو کر رکھ دیں پھر اسی پانی میں بادام پیس لیں اور یہ آمیزہ رات کو چہرے پر لگائیں اور صبح کسی معیار صابن سے منہ دھولیں۔

٭ عمر بڑھنے کے ساتھ ساتھ چہرے پر جھریاں نمودار ہو جاتی ہیں۔ انہیں دور کرنے کے لیے روزانہ 10 منٹ تک چہرے اور گردن پر زیتون یا روغن بادام کا مساج کریں پھر جلد کی مناسبت سے اچھے صابن سے منہ دھولیں۔ جھریوں کے ساتھ ساتھ یہ ٹوٹکہ جھائیوں کے لیے بھی مفید ہے۔

٭ ایک انڈے کی سفیدی کو اچھی طرح پھینٹ لیں۔ جب خوب جھاگ بن جائے تو اس میں ایک چمچ شہد ملالیں اور چہرے پر ماسک لگائیں۔ پندرہ منٹ بعد منہ دھولیں۔ ہفتے میں دو بار یہ عمل کریں۔ جھریاں دور ہو جائیں گی اور چہرے کی رنگت میں نکھار آئے گا۔

٭ دس تولہ شہد میں ایک لیموں کا رس ملا کر چہرے پر لیپ کریں اور پندرہ منٹ بعد دھولیں۔ جھریاں ختم ہونے کے علاوہ جلد کے زیادہ کھلے مساج بند بھی ہو جائیں گے۔

٭ چہرے کی رنگت کو نکھارنے کے لیے تھوڑا سا خشک پودینہ ایک گلاس پانی میں ابال کر بوتل میں بھرلیں اور فریج میں رکھ دیں پھر روزانہ صبح نہار منہ باقاعدگی کے ساتھ ایک چوتھائی چائے کا کپ پئیں۔ چہرے کی رنگت میں بہتری آنا شروع ہو جائے گی۔

٭ تھوڑا سا خشک دودھ لے کر انڈے کی سفیدی میں پھینٹ کر پانچ سے دس منٹ چہرے پر لیپ کریں۔ اس کے بعد چہرہ دھولیں۔ رنگت نکھری نکھیر نظر آئے گی۔

٭ لیموں پانی میں ملا کر پئیں، چھلکے سے چہرے پر مساج کریں۔ اچہیں تو چھلکے پر شہد بھی لگالیں۔ پندرہ منٹ بعد منہ دھولیں۔ اس کے علاوہ دن میں تین مرتبہ خاصے ٹھنڈے پانی سے منہ دھوئیں۔ چہرہ تر و تازہ رہے گا۔
میک اپ:
میک اپ ہمیشہ اپنی عمر کی مناسبت سے کریں۔ فیشل کریں، مساج کریں، ماسک لگائیں، اچھی کمپنی کا کاسمیٹک استعمال کریں۔ دھوپ میں نکلنے سے پہلے سن بلاک کریم چہرے، بازوئوں، ہاتھوں اور پائوں پر استعمال کریں۔ صبح و شام چہرے کی صفائی کے بعد موئسچرائزر لگائیں۔ تولیہ، برش، صابن اور دیگر چیزوں کو استعمال کرتے ہوئے خود سے نرمی کا سلوک کریں اور سب سے اہم بات یہ کہ خوش رہیں۔ خوشی آپ کے چہرے کی رونق کو بڑھا دیتی ہے۔
Pakistani-Latest-Party-Hairstyle-Collection-2013-For-Girls-7